This prayer to contain epidemic diseases was composed by His Holiness the 70th Je Khenpo Trulku Jigme Choedra.
Daily recitation will help in keeping away the contagious pestilence disease away.
༄༅། །རིམས་ནད་ཞི་བའི་སྨོན་ལམ་བཞུགས་སོ། །
ཧཱུྃ། བཅོམ་ལྡན་སྨན་གྱི་རིགས་ཀྱི་ལྷ་ཚོགས་ལ། །ཕྱག་འཚལ་མཆོད་བསྟོད་ཕུལ་བའི་བསོད་ནམས་ཀྱིས། །དུག་ལྔ་ལས་བྱུང་ནད་རིགས་ཀུན་ཞི་ནས། །ཡང་དག་བདེ་བའི་གོ་འཕང་ཐོབ་པར་ཤོག །བཅོམ་ལྡན་སྐུ་ཡི་རིགས་ཀྱི་ལྷ་ཚོགས་རྣམས། །གཏི་མུག་རྣམ་པར་དག་པའི་བྱིན་རླབས་ཀྱིས། །དེ་ལས་བྱུང་བའི་ནད་རིགས་ཀུན་ཞི་ནས། །མཐར་ཐུག་ཆོས་དབྱིངས་ཡེ་ཤེས་རྟོགས་པར་ཤོག །བཅོམ་ལྡན་གསུང་གི་རིགས་ཀྱི་ལྷ་ཚོགས་རྣམས། །འདོད་ཆགས་རྣམ་པར་དག་པའི་བྱིན་རླབས་ཀྱིས། །དེ་ལས་བྱུང་བའི་ནད་རིགས་ཀུན་ཞི་ནས། །མཐར་ཐུག་སོར་རྟོག་ཡེ་ཤེས་རྟོགས་པར་ཤོག །བཅོམ་ལྡན་ཐུགས་ཀྱི་རིགས་ཀྱི་ལྷ་ཚོགས་རྣམས། །ཞེ་སྡང་རྣམ་པར་དག་པའི་བྱིན་རླབས་ཀྱིས། །དེ་ལས་བྱུང་བའི་ནད་རིགས་ཀུན་ཞི་ནས། །མཐར་ཐུག་མེ་ལོང་ཡེ་ཤེས་རྟོགས་པར་ཤོག །བཅོམ་ལྡན་ཡོན་ཏན་རིགས་ཀྱི་ལྷ་ཚོགས་རྣམས། །ང་རྒྱལ་རྣམ་པར་དག་པའི་བྱིན་རླབས་ཀྱིས། །དེ་ལས་བྱུང་བའི་ནད་རིགས་ཀུན་ཞི་ནས། །མཐར་ཐུག་མཉམ་ཉིད་ཡེ་ཤེས་རྟོགས་པར་ཤོག །བཅོམ་ལྡན་འཕྲིན་ལས་རིགས་ཀྱི་ལྷ་ཚོགས་རྣམས། །ཕྲག་དོག་རྣམ་པར་དག་པའི་བྱིན་རླབས་ཀྱིས། །དེ་ལས་བྱུང་བའི་ནད་རིགས་ཀུན་ཞི་ནས། །མཐར་ཐུག་བྱ་གྲུབ་ཡེ་ཤེས་རྟོགས་པར་ཤོག །རྫོགས་སངས་རྒྱས་དང་ལུང་རྟོགས་དམ་པའི་ཆོས། །བྱང་སེམས་དགེ་འདུན་བཀའ་སྡོད་ཆོས་སྐྱོང་ཚོགས། །དྲང་སྲོང་སྨན་གྱི་རིག་འཛིན་བདེན་པའི་མཐུས། །རིམས་ནད་མ་ལུས་མྱུར་དུ་ཞི་གྱུར་ཅིག །ཆོས་ཉིད་རང་བཞིན་རྣམ་པར་དག་པ་དང་། །ཆོས་ཅན་རྒྱུ་འབྲས་བསླུ་མེད་བདེན་པའི་སྟོབས། །བདག་ཅག་ལྷག་བསམ་རྣམ་པར་དག་པའི་མཐུས། །ཇི་ལྟར་སྨོན་པ་དེ་བཞིན་འགྲུབ་གྱུར་ཅིག །
ཅེས་པ་འདི་ཡང་དགོན་ཆུང་རྣམ་གྲོལ་གླིང་དུ་སངས་རྒྱས་སྨན་བླའི་སྒྲུབ་པ་ཚོགས་སྐབས་རིམས་ནད་མྱུར་དུ་ཞི་བའི་སྨོན་ཚིག་ཏུ་རྗེ་མཁན་མིང་འཛིན་འཇིགས་གྲགས་པས་བྲིས་པ་དགེ་ལེགས་སུ་གྱུར་ཅིག །སརྦ་མངྒ་ལཾ།། །།
